美劇 冰與火之歌 權力遊戲 第八季第三集感想

今日睇完 權力遊戲 第八季第三集 The Long Night，未睇既就唔好再睇落去，字裡行間會有劇透。

文戲左兩集終於黎到呢集一次過爆發，全集一氣呵成，全無冷場，最正係呢集既鋪排都好正，好多時呢類俾惡勢力圍攻既電影，相信大家都係預左主角果班都可以活到最後贏得勝利，只係中段俾人圍既絕望，呢集都係一樣，但經過Red Wedding既劇情，以及George RR Martin果種經常出人意表的手法，大家都難保呢場戰鬥係咪真係會贏，而且都就快結局，狠心死主要角色真係唔奇，即使勝出戰鬥，又有咩角色可以活下去呢。

而A Game of Thrones故事吸引人既地方，相信基本上所有主要角色都會有著緊既Fans，隨住故事發展，開頭屬於被討厭的「奸角」角色，會慢慢被劇迷理解、明白、同情以及保祐支持佢，所以基本上係呢集既角色都唔希望會出事，但大軍壓境，全身而退的希望相信大家睇既時候都心裡有數，著緊自已所關心的角色的命運。

本集由一開始騎兵排陣，前方似乎有所動靜，大家都非常警惕，直至眼前的動靜出現的竟然係Melisandre梅麗珊卓，佢重出手點燃所有騎兵的武器，此刻都為劇中角色及觀眾都為增加一點士氣而且舒緩點點壓力。

之後騎兵衝鋒黑壓壓的畫面睇唔到敵人的確切位置同數量，但當接戰的短短果一秒畫面，觀眾就知道敵方的兵力異常地多，即使有點燃的武器無異是以卵擊石。鏡頭一轉，後方的步兵睇到火光愈來愈少，對前方的戰鬥顯得焦慮，而不出所料，只有小量殘兵從黑暗中逃回戰線，而White Walker緊隨其後直擊步兵防線，觀眾被點燃的果份士氣又再被打落低谷。

形勢開始轉壞，龍女決定唔等NightKing的出現，騎龍先行出擊，龍沒有令人失望，White Walker輕易被龍焰燒死，城中士兵見狀又再被振奮，然後龍女見到White Walker的Leader，準備攻擊時一大股寒風吹至，視野大跌，原來Night King殺到，龍女同Jon Snow係寒霧中追逐Night King。

整個畫面有火光的橙紅，亦有寒霧的藍白，冰與火在這戰場上交融。

城外列陣的步兵被White Walker窮追猛打，即將被突破到城內，守軍見狀決定撒退，灰蟲子Grey Worm命令佢既部屬堅守，俾其他士兵退入城中，但無垢者當然不敵，逐步被消滅，灰蟲子係迫不得已下斷開回城的退路，並命人點燃護城的壕溝。在寒風中壕溝無法被點燃，士兵一個個衝去嘗試但都被White Walker擊倒，觀眾心急之際，Melisandre 梅麗珊卓走出城中，唸出咒語嘗試點燃，在兵荒馬亂的情況下，梅麗珊卓盡力集中精神，卻依然被附近的喊殺聲所打擾，White Walker已經盡殲外圍的無垢者，係最後一刻梅麗珊卓成功發功，將整個包圍臨冬城的壕溝都點燃了，而且龍女同Jon Snow原本迷失於寒霧中，看到地上的火龍得知臨冬城的位置趕去支援，相信觀眾頓時又覺得在絕望中看到希望。

之後的劇情一路發展，心情一直在絕望/希望中搖擺，就連Arya的最後一擊都要俾Night King捉到，成集個幾鐘雖然都預左應該會有較好的結局，但都仍然好緊張，唔到尾唔知佢會點玩法。

本集係緊張的紛圍下亦有唔少感性位，我以為Sansa會係墓室自殺，Theon亦都被Bran Stark肯定，可惜Theon的故事亦應到此為止。

放假前再入返 3377 遠洋集團

五一長假期前再係收市前5分鐘$3.5入返 1注3377 遠洋集團短線，今日恆指跌200點成交不足700億，調整過後挾五一數據靚仔，假期返黎個市可能會旺返，上證近期既跌勢係假期冷靜後貪婪或會回歸，再推一推上去就即走。 但願如此。

買入 3377 遠洋集團

今早係$3.5 買入 1注3377 遠洋集團，比起較早前買入既$3.6還要低，本身搏上證反彈，但高開回跌，不過唔跌又未必入到，搏超短線。

(剛於$3.59 沽清3377 遠洋集團，上證重跌緊，唔想等太耐，又執少少，再等其他機會。)

沽出 2588 中銀航空租賃，買入2136 利福中國

今早開市後不久於$67.7沽出 2588 中銀航空租賃，1個月執8%，補回一些現金，股息率約3.5%唔夠高，唔係會繼續持有，睇下遲D有無機會買返，無就買第二隻算數。

另係15分鐘後於$2.82買回1注偉哥股 2136，較早前係$3邊沽清，當時買入均價約$2.9，如今又有平D既價錢，入返1注看門口。

(同日15:15分$2.88沽清2136，曾經上過$2.92但食緊朱古力新地無睇市錯失機會，跌返會補回。)

另外係4月2日均價約$4.1沽清的3377 遠洋集團 ，今日低見$3.49 ，睇個勢重未跌完，重低過我上次買入既均價 $3.6，如果再跌有機會入小注搏反彈。

同時 3399 粵運交通，係4月11日均價約$3.3沽清，今日又跌到$3.19，已經返回宣布恢複A股申請之前的價位，但恆指只係輕微調整，萬一黎緊個市真係有比較大既調整，咪有好多平貨執？

從未如此有耐性

買股票要耐性相信好多人都聽過，要有好價入貨，要有厚利出貨，要有冷靜持貨，三者都係股票投資過程中賺到大錢的必要條件。

自2017年中開始陸續增加現金比例，去到目前接近3成現金，一直都無動用落場，維持相對黎講較高的現金比例，持續接近2年，比著以前的我已經買入九成資金，係我投資生涯入面最有耐性的一次。

我唔知道到底個市幾時先再會有一次千載難逢的入市機會，但我知道如果等到就可以坐定定穩贏。近年好多投資資訊鼓勵年青人盡早投資，我就唔太同意，我認為年青人係資本未算充足，人生充滿可能的時候，唔需要太早投資，但我絕對同意要盡力儲蓄。相對而言，年青人儲蓄先係財富增長最快最穩陣的方式，投資無話包生仔，最多只用小部份資金落場感受，但大規模入市部署我就唔同意。

只要有恆心，儲蓄到一定彈藥，加之於持續對投資的學習同理解，係有利的時間出擊，就可以輕鬆係投資市場穩坐釣魚船，講到尾都係耐性，唔需要為投資而投資，市場大把選擇，市跌時好醜都跌，好市時雞犬皆升，為蠅頭小利而將血汗投入市場，只係市場的態勢決定你的命運。

當然，如果你的資金已經達到一定份量，通漲蠶食的可怕就無法唔去投資。

恆指重上3萬點

恆指近日重上三萬點，投資現金比例約27%，三萬點樓上實在唔係太有動機去落注，雖然市場有時會有聲音指恆指會上到3萬8、4萬、5萬，但我既然都有超過7成持倉，假如真係上到3萬8、4萬，我既組合都一定有得益，無謂咁搏。

業績期即將告一段落，個市會唔會係貿戰協議簽定後，5、6月時會有所回落呢? 目前恆指月線仍未偏高，大市大跌壓力唔大，最大威脅就係咁keep住唔上唔落。

最近回顧返之前幾年短炒賺錢的記錄，有幾年既做法都係年中左右入貨，買入大型穩定既股票，過年後新年咁上下就有不錯的利潤，但近年轉炒一D小型股，感覺力有不遞，所以今年應該會轉變下策略，買返大型股(如內銀)，曾經我既諗法係資金少既人先需要做高風險投資，而資金去到一定程度，買返穩陣股去炒，贏面更大，穩穩陣陣跌亦唔擔心。

11/4 10:25 ，短炒既3399粵運交通原來昨晚出左通告，A股上市申請已恢複審查，今早最高見$3.35，剛於均價$3.3沽清執小小，我估計一日未正式完成，粵運都未必會有太大升幅，而且恆指3萬關有壓力，等到粵運除息見返$3左右應該會入返。

3377 遠洋食一食

估唔到上月中均價$3.6買入，短線的3377 遠洋一反彈就彈得咁勁，中午過後升穿$4.2單日升接近15%，先走一半，留一半心大心細，日線即將見頂，但月線仍處低位，應該會等多陣，升穿埋$4.25並企穩或有機衝$5。 

4/4 恆指突破過3萬點後回落，3377今日亦回落，雖然我覺得3377應該重有得上，但希望增加返現金比重，決定沽清以短炒為目標的3377。