836 華潤電力減派息的啟示

上星期電力龍頭股836 華潤電力公報業績，不單盈利下跌，連帶其於16年的連續三年穩定派息的政策都臨尾香，最終要大削派息至末期息20.3港仙,全年32.5港仙，好彩我並無持有836甚至將佢重倉成為其中一隻收息主力，否則會大受打擊。

假如投資者係近兩年買入一心打算穩定收息，假設買入價為$14，未減派息時年厘息約6.25%，現在大減派息，厘率降至2.32%，大失預算。

較早前在苦無心水穩定高息股票投資的時候，在其承諾3年不變的派息政策下都曾考慮過華潤電力，但認為3年其實都唔係好長既時間，而且價錢亦唔算吸引，佢主力的火電面臨住煤炭價格長期高位，火電轉型，政府政策如控制電價上升以及電力市場改革等每項都對836造成不確定，最終無落注，反而係上年均價$2.35 入到隻 1883 中信國際電訊，前景同穩定性都較836 華潤電力為佳。

講左都可以反口，當然有佢既原因同現實因素，類似的情況發生過係5號仔匯豐身上，07年的5號一手派息達$3000，當時相信佢既穩建，業務多元等看似擁有穩定的因子。而係匯控供股前的幾個月，在股災當中曾發出聲明，聲稱自已的穩建，安撫一眾投資者，但隨住危機擴大，資金壓力增加，匯控迫不得已在最壞的情況下宣布12股供5股的供股計劃，派息亦大削至每手少於$1100，經濟下行，規管改變，匯豐到目前都未能恢複到以往的派息金額，而長期低息環境，加之於環球經濟疲弱，寬鬆的貨幣政策重臨似乎不遠矣，匯豐目前的股息率約超6%，係將來的經濟低潮下派息是否仍然穩定變數愈黎愈大。

當年係高位訓身買匯豐至錯失之後的撈底機會，教訓影響至今，而買股收息講到尾都係睇返公司本身的質素同前景，以及有足夠的分散部署，買股收息，不爭朝夕。