貿易戰如何走？

今日起身睇睇新聞，Trump又出招，係香港夜晚時份發話：本星期五會將已經收緊10%關稅的貨品都升到25%，字裡行間似乎沒有留下什麼餘地，是否意味談判出現大問題？但又同過去幾個星期市場理解同官員所表達的唔同，目前我傾向認為係有問題，中國係一個意識形態極重既國家，係就快達成協議前又出新花樣，就算本身都真係有機完成協議，咁樣搞一搞中國都唔會咁容易妥協，而Trump係同北韓的談判中已經達唔到佢既預期，如今最重頭的中美貿談都傾唔成，咁似乎中美貿談中的確有些事項係中美都唔接受，未必係純粹想係最後階段再抬價咁簡單。

恆指方面一早就跌成千點，不過我都無理，既然又變返做政治市，短期走勢無法把握，短炒風險高，我就忍忍手，希望再跌多D，然後又明朗一D再出手。

依家就耐心睇睇今晚Trump有無更多表態，如果放返軟聲氣加上中國無大既反制宣告，個市應會反彈；但若中國出招反制，咁應意味短期貿談應該無法達成協議，短線仍要下跌。

7/5: 今早恆指反彈，尋晚亦無再壞的消息，道指只係小跌65點，似乎未係壞透，今日開市又係$3.43入1注 3377, 都係睇超短線。 

9/5: 呢兩日未有打算買貨，部份股開始去返可以吸納既水平，但未到超值，應該會觀望埋呢2日到底傾成點，中國俾人炳左拳都照去傾，會唔會係想說服Trump就算我咁改條文都唔代表我唔會執行，老實我係Trump就唔會再俾位你走，我相信都係睇大陸肯唔肯讓步或者係其他地方再俾甜頭，星期五如期落實加稅既話恆指應重會繼續跌，如短期睇唔到可以傾得成，先向26000點進發。

14/5: 尋晚大陸宣布還擊，美國亦正研究將所有中國貨品徵稅，純粹貿易協議我仍然認為最終會達成，除非美國已經認為現在係反抬既時候，我覺得唔係去到呢個地步，而中方的回應對比起面對其他國家明顯冷靜克制，似係為日後達成協議時唔好劃破面，兩邊擺出的姿態都未太惡劣，呢個情況真係聽日突然話傾掂又得，再升級亦可。

其實貿易戰的深層意義係中方經常講你中有我、我中有你呢個麻痹美方的講法，係Trump面前唔太管用，引申的係美國政界是否真的對中方的外交取向有所改變？假如真係要全力針對中國，互徵高關稅之後，美國仍有大把方法，例如好似現在5G脅迫其他國家棄用華為，而歐洲兩大佬法德目前仍然係較為中立，而且意識形態同Trump並不接近，美歐有由Trump製造出黎既矛盾，而一旦法德政界換人，轉向親美的話，對中國的壓力就會更大，到時未必只係限制5G咁簡單。

大市跌左2000落到2萬8邊，感覺唔係好恐慌，恆指呢10年嚇住大，咩危機都好似無疾而終，股民對海嘯式的下跌逐漸忘記，更擔心的係長期低息導致的通貨膨脹，見有調整就把握機會入市，而A股都跌到呢個位，下跌空間有限，除非中美兩國出現嚴重經濟危機，否則就算升級的貿易戰令港股股災式下跌機會不大。

已經將資金分4階段入市，26000-28000係第一階段，今日先入1注 405 越秀房地產信託基金，其實我想買好多年，每次都等等等，愈等愈升，本身諗住除息後有低位買但又唔太低，決定因應今次機會先拎1注。